ဧရာဝတီတိုင်းဒေသကြီး ဝန်ကြီးချုပ်ဦးတင်မောင်ဝင်းသည် အစိုးရအဖွဲ့ဝင် ဝန်ကြီးများ၊ ဌာနဆိုင်ရာများနှင့်အတူ ယနေ့နံနက်ပိုင်းက ရေကြည်မြို့နယ်၊ နွားရေတိုက်ကျေးရွာ တောင်သူဦးစိုးလှိုင်၏ လယ်ဧက၌ ၂၀၂၃ - ၂၀၂၄ခုနှစ်၊  မိုးစပါးတစ်ဧက (၁၀)တင်းနှုန်း ပိုမိုတိုးတက်ထွက်ရှိရေးအတွက် ဆင်းသုခစပါးမျိုး ပျိုးထောင်စိုက်ပျိုးနေမှုအား ကြည့်ရှုအားပေးပြီး တောင်သူများထံသို့ နိုင်ငံ့စီးပွားမြှင့်တင်ရေးရန်ပုံငွေဖြင့် ဆောင်ရွက်သည့် သွင်းအားစုများ ထောက်ပံ့ပေးအပ်ကာ တောင်သူများနှင့် ရင်းရင်းနှီးနှီးတွေ့ဆုံ၍ “တောင်သူကြီးများအနေဖြင့် ပိုက်ဆံလျှော်ထည့်သွင်းစိုက်ပျိုး ခဲ့သဖြင့် မြေဆီလွှာဖွံ့ဖြိုးတိုးတက်လာသည်ကိုမြင်တွေ့နေရပြီဖြစ်ပါကြောင်း၊ သဘာဝမြေသြဇာများအသုံးပြု၍ ဓာတ်မြေသြဇာသုံးစွဲမှုများလျော့ချကြရန်နှင့် အထွက်နှုန်းများ တိုးတက်ရန်အတွက်  မျိုးကောင်းမျိုးသန့်စပါးများဖြင့် ပြောင်းလဲစိုက်ပျိုးခြင်း၊ ခေတ်မီစိုက်ပျိုးနည်းစနစ်ပြောင်းလဲစိုက်ပျိုးခြင်းများ လုပ်ဆောင်ရန်” မှာကြားခဲ့သည်။ ဆက်လက်၍ တိုင်းဒေသကြီးဝန်ကြီးချုပ်နှင့် တာဝန်ရှိသူများသည် ငါးတဲစုကျောင်းတိုက် ဓမ္မာရုံ၌ ပြုလုပ်သည့် နွားရေတိုက်ကျေးရွာအုပ်စုအတွင်း မိုးစပါး အကျိုးတူလယ်ယာစနစ်( Contract Farming) ဆောင်ရွက်မည့် တောင်သူများထံသို့ ယူနိုက်တက်ဧရာဝတီကုမ္ပဏီ (အများနှင့်သက်ဆိုင်သောဖွံ့ဖြိုးတိုးတက်ရေးကုမ္ပဏီ)မှ စိုက်ပျိုးစရိတ်ပေးအပ်ခြင်းနှင့် ဩဂဲနစ်စိုက်ပျိုးတောင်သူများထံ သဘာဝမြေဩဇာ ပေးအပ်ပွဲအခမ်းအနားသို့ တက်ရောက်၍ “ မိမိတာဝန်ယူချိန်မှစ၍ စိုက်ဧကများပြည့်မီရေး၊ ဧရာဝတီပေါ်ဆန်း အရည်အသွေးကောင်းမွန်စေရေးနှင့် ဈေးကွက် ပြန်လည်ရရှိရေးအတွက် သုတေသနများပြုလုပ်ရန် တောင်သူများ၊ စိုက်ပျိုးေရးပညာရှင်များနှင့်ပေါင်းစပ်ဆောင်ရွက်ခဲ့ပါကြောင်း၊ ယခုအခါတွင် အရည်အသွေးပြည့်ဝသည့် ဓာတုကင်းလွတ်ပေါ်ဆန်းများအား နွားရေတိုက်ကျေးရွာအတွင်း စိုက်ပျိုးထုတ်လုပ် ​ေနပြီဖြစ်ပါကြောင်း၊ မြေဆီလွှာပြုပြင်ခြင်း၊ သဘာဝမြေဩဇာပိုမိုသုံးစွဲစေခြင်းနှင့် ပိုက်ဆံလျှော် (သစ်စိမ်းမြေဩဇာ)ထည့်သွင်းခြင်းတို့အတွက် စိုက်ပျိုးရေးသုတေသနလုပ်ငန်းများအပြင် ဈေးကွက်သုတေသနလုပ်ငန်းများ အစဉ်ပြုလုပ်နေရန် လိုအပ်ပါကြောင်း၊ လာမည့်နှစ်စိုက်ပျိုးရာသီတွင် စိုက်ဧကအားလုံး တိုင်းလုံးကျွတ် သစ်စိမ်းမြေဩဇာ (ပိုက်ဆံလျှော်)အပြည့်အဝထည့်သွင်း စိုက်ပျိုးသွားမည်ဖြစ်ပါကြောင်း၊ ဧရာဝတီပေါ်ဆန်းများ မူလအရည်အသွေးသို့ ပြန်လည်ရောက်ရှိစေရေးအတွက် စနစ်တကျဖြင့် တောင်သူများအားလုံး ပူးပေါင်းဆောင်ရွက်ပါက ဆန်အရည်အသွေးများလည်း တိုးတက်လာမည်ဖြစ်ပါကြောင်းနှင့် သဘာဝမြေဩဇာအသုံးပြု၍ ဓာတုကင်းလွတ်ပေါ်ဆန်းစိုက်ဧက(၂၀၀)အား စိုက်ပျိုးဆောင်ရွက်သွားမည် ဖြစ်ပါကြောင်း၊  တောင်သူများအနေဖြင့် ရာသီဥတုဖောက်ပြန်မှုများ ရှိနေသကဲ့သို့ စိုက်ပျိုးရာတွင်လည်း သတိပြုလိုက်နာဆောင်ရွက် လိုအပ်ပါကြောင်းနှင့် တစ်ဧက အထွက်နှုန်းများတိုးတက်စေရေးအတွက်  တောင်သူများအားလုံးဝိုင်းဝန်း ပူးပေါင်းဆောင်ရွက်မှသာ ပန်းတိုင်အထွက်နှုန်းရောက်ရှိမှာဖြစ်ပါကြောင်း” အဖွင့်အမှာစကားပြောကြားသည်။  ထို့နောက် ယူနိုက်တက်ဧရာဝတီကုမ္ပဏီ(အများနှင့်သက်ဆိုင်သောဖွံ့ဖြိုးတိုးတက်ရေးကုမ္ပဏီ)မှအုပ်ချုပ်မှုဒါရိုက်တာ အဖွဲ့ဝင် ဦးအောင်မင်းနိုင်က စိုက်ပျိုးစရိတ်ပေးအပ်ခြင်းနှင့်  ဩဂဲနစ်စိုက်ပျိုးတောင်သူများထံ သဘာဝမြေဩဇာများ ပေးအပ်ရသည့်အကြောင်းအရင်းများကို ရှင်းလင်းပြောကြားပြီး  အကျိုးတူစနစ်ဖြင့် ဆောင်ရွက်မည့် တောင်သူများအား စိုက်ပျိုးစရိတ်များ ထောက်ပံ့ပေးအပ်ရာ အခမ်းအနားသို့ တက်ရောက်လာသော တောင်သူများကိုယ်စား တောင်သူသုံးဦးက လက်ခံရယူခဲ့သည်။ ဆက်လက်၍ မြောင်းမြမြို့စိုက်ပျိုးရေးသုတေသနဦးစီးဌာန မန်နေဂျာဒေါ်ဖြူပြာလွင်က ဩဂဲနစ်ပေါ်ဆန်းစပါး စိုက်ပျိုးရေးနှင့်ပတ်သက်၍ ရှင်းလင်းတင်ပြပြီးနောက် စိုက်ပျိုးရေးတောင်သူများထံ နိုင်ငံ့စီးပွားမြှင့်တင်ရေးရန်ပုံငွေမှ ထောက်ပံ့သော သဘာဝမြေဩဇာများ လွှဲပြောင်းပေးအပ်ခဲ့သည်။ထို့နောက် အခမ်းအနားသို့ တက်ရောက်လာသော တောင်သူများကိုယ်စား တောင်သူတစ်ဦးက ကျေးဇူးတင်စကားများ ပြန်လည်ပြောကြားခဲ့ပြီး တိုင်းဒေသကြီး ဝန်ကြီးချုပ်က စိုက်ပျိုးရေးထုတ်ကုန်များပိုမိုတိုးတက်ထုတ်လုပ်နိုင်စေရေး၊ သဘာဝေမြဩဇာများပိုမိုသုံးစွဲစေရေး၊ ခေတ်မီစိုက်ပျိုးနည်းစနစ်များအသုံးပြုစေရေးနှင့်တောင်သူများ၏ လူမှုစီးပွားဘဝဖွံ့ဖြိုးတိုးတက်စေရေး ဆောင်ရွက်ရန် နိဂုံးချုပ်အမှာစကားများ ပြောကြား၍ အကျိုးတူလယ်ယာစနစ်ဆောင်ရွက်နေမှုနှင့် ပေါ်ဆန်းစပါးမျိုးအားကြည့်ရှုအားပေးခဲ့သည်။ ထို့နောက် ငါးတဲစုကျောင်းဆရာတော်အား ဖူးမြော်ကြည်ညို၍ သာသနာရေးဆိုင်ရာ ကိစ္စရပ်များအား တင်ပြလျှောက်ထားပြီး လှူဖွယ်ပစ္စည်းများ ဆက်ကပ်လှူဒါန်းခဲ့သည်။ ဆက်လက်၍ တိုင်းဒေသကြီးဝန်ကြီးချုပ်နှင့်အဖွဲ့သည် ရေကြည်မြို့နယ်၊ ငသိုင်းချောင်းမြို့၊ မအူကုန်ကျေးရွာအုပ်စု၊ ဒေါင့်မှန်ကျေးရွာရှိ ဦးမောင်မောင်သော်၏ “ဇာမဏီ” ပြာစိမ်းနွားမျိုးသန့် မွေးမြူရေးခြံသို့ သွားရောက်၍ တိရစ္ဆာန်စွန့်ပစ်ပစ္စည်းများဖြင့်  ဇီဝမြေဩဇာ ထုတ်လုပ်မှု၊ ဈေးကွက်အတွင်း ဖြန့်ဖြူးရောင်းချမှုအခြေအနေများကို မေးမြန်းခဲ့ပြီး ဇီဝမြေဩဇာများတိုးချဲ့ထုတ်လုပ်နိုင်ရန်နှင့် မြေလွတ်နေရာများတွင် ဇီဝမြေဩဇာအသုံးပြု၍ သီးပင်စားပင်များ စိုက်ပျိုးနိုင်ရေးမှာကြားခဲ့ပြီး မွေးမြူရေးခြံအတွင်း ပြာစိမ်းနွားမျိုးသန့်မွေးမြူထားရှိမှုအား ကြည့်ရှုစစ်ဆေးခဲ့ကာ စနစ်တကျမွေးမြူစေရေး၊ တိရစ္ဆာန်စွန့်အညစ်အကြေးများအား သဘာဝမြေဩဇာအဖြစ်အသုံးပြုစေရေမှာကြားခဲ့သည်။ အဆိုပါ “ဇာမဏီ” ပြာစိမ်းနွားမျိုးသန့် မွေးမြူရေးခြံတွင် (၂)နှစ်အောက်နွား (၂၇)ကောင်၊ (၂)နှစ်အထက် (၃၀)ကောင်၊ စုစုပေါင်း (၅၇)ကောင်မွေးမြူထားကြောင်းသိရသည်။ ယင်းနောက် တိုင်းဒေသကြီး ဝန်ကြီးချုပ်သည် ရေကြည်မြို့အမှတ်(၁)အခြေခံပညာအထက်တန်းကျောင်း တေဇာသီရိခန်းမ (၁၁၀ပေ×၅၄ပေ)တိုးချဲ့ပြုပြင်ခြင်း လုပ်ငန်းများအား ကြည့်ရှုစစ်ဆေးပြီး သတ်မှတ်ထားသောကာလများအတွင်း အချိန်မီပြီးစီးစေရေးအတွက် အလေးထားဆောင်ရွက်ရန်နှင့်  စံချိန်စံညွှန်းများပြည့်မီရေးနှင့်ရေရှည် တည်တံ့အောင် ပြုပြင်ထိန်းသိမ်းရေး လုပ်ငန်းများ စနစ်တကျဆောင်ရွက်ရေးမှာကြားခဲ့သည်။   ဆက်လက်၍ တိုင်းဒေသကြီး ဝန်ကြီးချုပ်နှင့် တာဝန်ရှိသူများသည် ကျုံပျော်မြို့နယ်၊ မြေရဲတောင်ကျေးရွာအုပ်စု၊ တောင်သူ ဦးသိန်းတန်၏ လယ်ဧက (၂)ဧက၍ ပြုလုပ်သည့် ၂၀၂၃-၂၀၂၄ခုနှစ်၊ မိုးစပါးတစ်ဧက (၁၀)တင်းနှုန်း ပိုမိုတိုးတက်ထွက်ရှိရေးအတွက် မျိုးကောင်း၊ မျိုးသန့်စိုက်ပျိုးခြင်း ကွင်းသရုပ်ပြပွဲ၊ RS to CSမျိုးစေ့ထုတ်စိုက်ခင်းအား ကြည့်ရှုအားပေးပြီး နိုင်ငံ့စီးပွားမြှင့်တင်ရေးရန်ပုံငွေဖြင့် ဆောင်ရွက်သည့် မိုးစပါးတစ်ဧက(၁၀)တင်းနှုန်း ပိုမိုတိုးတက်ထွက်ရှိရေးအတွက် သွင်းအားစု(ဓာတ်မြေဩဇာ+သဘာဝမြေဩဇာ ) ပေးအပ်ပွဲအခမ်းအနားသို့တက်ရောက်ခဲ့ရာ လယ်ယာမြေစီမံခန့်ခွဲမှုနှင့်စာရင်းအင်းဦးစီးဌာန တိုင်းဦးစီးမှူးက ကျုံပျော်မြို့နယ်အတွင်းရှိ လယ်ဧကများအလိုက် မိုးစပါးတစ်ဧက(၁၀)တင်းနှုန်းပိုမိုတိုးတက် ထွက်ရှိရေးဆောင်ရွက်ထားရှိမှု အခြေအနေများ၊ ပီလောပီနံစိုက်ပျိုးပြီးစီးမှု အခြေအနေများကိုရှင်းလင်းတင်ပြခဲ့ပြီး တိုင်းဒေသကြီးဝန်ကြီးချုပ်က မိုးစပါးစိုက်ပျိုးရာသီချိန်ဖြစ်၍ တောင်သူများအားတွေ့ဆုံအားပေးခြင်းဖြစ်ပါကြောင်း၊ လာမည့်နှစ်တွင် တိုင်းလုံးကျွတ် သစ်စိမ်းမြေဩဇာ (ပိုက်ဆံလျှော်)အပြည့်အဝ စိုက်ပျိုးနိုင်ရေး ဆောင်ရွက်သွားမည်ဖြစ်ပါကြောင်း၊ သဘာဝမြေသြဇာများအသုံးပြု၍ ဓာတ်မြေသြဇာသုံးစွဲမှုများလျော့ချကြရန်၊ အထွက်တိုး မျိုးကောင်း မျိုးသန့်များသုံးစွဲကြရန်၊ ပီလောပီနံစိုက်ဧကများတိုးချဲ့စိုက်ပျိုးနိုင်ရေး ဆောင်ရွက်ရန်နှင့် ကောက်စိုက်စက်ဖြင့်စိုက်ပျိုးခြင်းသည် စပါးအထွက်တိုးခြင်း၊ ကုန်ကျစရိတ်များသက်သာခြင်း တို့ကြောင့် ကျယ်ကျယ်ပြန့်ပြန့်အသုံးပြုစေရေးမှာကြားခဲ့ပြီး တောင်သူများအတွက် နိုင်ငံ့စီးပွား မြှင့်တင်ရေးရန်ပုံငွေဖြင့်ဆောင်ရွက်သည့် သွင်းအားစုများ ထောက်ပံ့ပေးခဲ့သည်။

၂၀၂၃ခုနှစ်၊ ပြည်နယ်နှင့်တိုင်းဒေသကြီး ကာယဗလနှင့်ကာယကြံ့ခိုင်မှု အားကစားပြိုင်ပွဲသို့ ဝင်ရောက်ယှဉ်ပြိုင်မည့် ဧရာဝတီတိုင်းဒေသကြီး လက်ရွေးစင်အားကစားသမားများအား အောင်နိုင်ရေးအလံပေးအပ်ပွဲ အခမ်းအနားကို ယနေ့နံနက်ပိုင်းက တိုင်းဒေသကြီးအစိုးရအဖွဲ့ရုံး၊ အစည်းအဝေးခန်းမ(၁)တွင် ပြုလုပ်ခဲ့ရာ အခမ်းအနားသို့ တိုင်းဒေသကြီးဝန်ကြီးချုပ် ဦးတင်မောင်ဝင်း၊ အစိုးရအဖွဲ့ဝင်ဝန်ကြီးများ၊ အားကစားနှင့်ကာယပညာဦးစီးဌာနမှ တာဝန်ရှိ သူများ၊ အသင်းအုပ်ချုပ် နည်းပြများနှင့်  ပြိုင်ပွဲဝင်အားကစားသမားများ တက်ရောက်ခဲ့ကြသည်။ ဦးစွာ တိုင်းဒေသကြီးဝန်ကြီးချုပ်အား ပြည်နယ်နှင့်တိုင်းဒေသကြီး ကာယဗလနှင့် ကာယကြံ့ခိုင်မှုပြိုင်ပွဲသို့  ဝင်ရောက်ယှဉ်ပြိုင်မည့်  အသင်းအုပ်ချုပ်သူ၊ နည်းပြများနှင့် အားကစား သမားများက တစ်ဦးချင်းမိတ်ဆက်ပြီး အသင်းအုပ်ချုပ်သူမှ  ပြိုင်ပွဲဝင်ရောက်ယှဉ်ပြိုင်မည့် အစီအစဉ်များအား ရှင်းလင်းတင်ပြသည်။ ယင်းနောက် တိုင်းဒေသကြီးဝန်ကြီးချုပ်က “ ကာယဗလ နှင့် ကာယကြံ့ခိုင်မှုပြိုင်ပွဲသို့ဝင်ရောက်ယှဉ်ပြိုင် မည့်အားကစားသမားများအနေဖြင့် ပြိုင်ပွဲဝင် အတွေ့အကြုံရှိသည့်သူများလည်းပါဝင်ပါကြောင်း၊ တိုင်းဒေသကြီးအနေဖြင့် ယခင်နှစ်ပြိုင်ပွဲများတွင် ဆုတံဆိပ်အသီးသီးရရှိခဲ့သည်ကို တွေ့ရှိရပါကြောင်း၊ အတွေ့အကြုံရှိ အားကစားသမားများအား စခန်းသွင်းလေ့ကျင့်မှုများပြုလုပ်ခဲ့ခြင်းကြောင့် အောင်မြင်မှုရရှိမည်ဟုယုံကြည်ပါကြောင်း၊ ကျန်းမာရေးကို ထိခိုက်စေမည့်အနေအထိုင်၊ အစားအသောက်များကို ဂရုစိုက်ရှောင်ကြဉ်ရန် လည်းလိုပါကြောင်း၊ ပြိုင်ပွဲဝင်ရောက်ရမည့်နေရာများကိုလည်း သတ်မှတ်အချိန်မီအောင်ရောက်ရှိရန် လိုအပ်မည်ဖြစ်ပါကြောင်း၊ ပြိုင်ပွဲများကိုသွားရောက်ယှဉ်ပြိုင်ကြမည့် အားကစားသမားများ၊ နည်းပြများနှင့် အသင်းအုပ်ချုပ်သူများအနေဖြင့် မိမိတို့အသင်း အောင်မြင်မှုများရရှိအောင် ဆထက်ထမ်းပိုးကြိုးစားဆောင်ရွက်သွားကြရန်နှင့် တိုင်းဒေသကြီးဂုဏ်ဆောင်၍ ရွှေတံဆိပ်ဆုများ ရရှိအောင် စွမ်းဆောင်နိုင်ကြပါစေကြောင်း” အမှာစကားပြောကြားပြီး ကာယဗလနှင့် ကာယကြံ့ခိုင်မှု အားကစားပြိုင်ပွဲသို့ဝင်ရောက်ယှဉ်ပြိုင်မည့် ဧရာဝတီတိုင်းဒေသကြီးကိုယ်စားပြု အသင်းမှတာဝန်ရှိသူများထံသို့ အောင်နိုင်ရေးအလံနှင့် ချီးမြှင့်ထောက်ပံ့ငွေများပေးအပ်ခဲ့သည်။ ဆက်လက်၍ နေ့လည်ပိုင်းတွင်ပုသိမ်မြို့၊ ဧရာရွှေဝါခန်းမ၌ ၂၀၂၃ခုနှစ်၊ ပြည်နယ်နှင့် တိုင်းဒေသကြီး ကာယဗလနှင့်ကာယကြံ့ခိုင်မှု အားကစားပြိုင်ပွဲသို့ဝင်ရောက်ယှဉ်ပြိုင်မည့် ဧရာဝတီတိုင်းဒေသကြီး လက်ရွေးစင်အားကစားသမားများ၏ သရုပ်ပြပွဲအခမ်းအနားအား ပြုလုပ်ခဲ့ရာ တိုင်းဒေသကြီးဝန်ကြီးချုပ်ဦးတင်မောင်ဝင်းနှင့်ဇနီး၊ အနောက်တောင်တိုင်း စစ်ဌာနချုပ်တိုင်းမှူးနှင့်ဇနီး၊ ပုသိမ်လေတပ်စခန်းဌာနချုပ်မှူးနှင့်ဇနီး၊ အစိုးရအဖွဲ့ဝင်ဝန်ကြီးများ နှင့်ဇနီးများ၊ ဌာနဆိုင်ရာများနှင့် လက်ရွေးစင်သရုပ်ပြအားကစားသမားများတက်ရောက်ခဲ့ကြသည်။ ရှေးဦးစွာ တိုင်းဒေသကြီးဝန်ကြီးချုပ်နှင့် ဧည့်သည်တော်များအား ပြိုင်ပွဲဝင်အားကစား သမားများနှင့် တစ်ဦးချင်းမိတ်ဆက်ပေးပြီးနောက် အသက်(၂၁)နှစ်အောက် ပြိုင်ပွဲဝင်၊ (၆၀)ကီလိုတန်းပြိုင်ပွဲဝင်၊ (၆၅)ကီလိုတန်းပြိုင်ပွဲဝင်၊ (၇၀)ကီလိုတန်းပြိုင်ပွဲဝင်၊ (၇၅)ကီလိုတန်း ပြိုင်ပွဲဝင်များနှင့် (၇၅)ကီလိုတန်းအထက်ပြိုင်ပွဲဝင်အားကစားသမားများက စိတ်ကြိုက် ကိုယ်ဟန်သရုပ်ပြသခြင်းများပြသပြီးနောက် ကာယဗလပြိုင်ပွဲဝင်များကသတ်မှတ် ကိုယ်ဟန်(၇)မျိုးအား ဆက်လက်စုပေါင်းသရုပ်ပြသကြသည်။ ယင်းနောက် တစ်ဦးချင်းသရုပ်ပြသမှုကို တိုင်းဒေသကြီး ဝန်ကြီးချုပ် နှင့်ဧည့်သည်တော်များက ကြည့်ရှုအားပေးခဲ့ကြကြောင်းသိရှိရသည်။

ဧရာဝတီတိုင်းဒေသကြီး ဝန်ကြီးချုပ်ဦးတင်မောင်ဝင်းသည် အစိုးရအဖွဲ့ဝင်ဝန်ကြီးများ၊ ဌာနဆိုင်ရာများနှင့်အတူ ယနေ့ညနေပိုင်းက ဖျာပုံခရိုင်၊ ကျိုက်လတ်မြို့နယ်အတွင်းရှိ မျိုးမြတ်မွန်ဆန်စက်နှင့် စပါးခွံလောင်စာတောင့်စက်ရုံအား ကြည့်ရှုစစ်ဆေးခဲ့သည်။ ရှေးဦးစွာ တိုင်းဒေသကြီးဝန်ကြီးချုပ်သည် ကျိုက်လတ်မြို့၊ မျိုးမြတ်မွန် ဆန်စက်နှင့် စပါးခွံလောင်စာတောင့်စက်ရုံသို့ သွားရောက်ကြည့်ရှုစစ်ဆေးခဲ့ရာ တာဝန်ရှိသူများက စပါးခွံလောင်စာသုံး Gasifier ဖြင့် စက်ရုံလည်ပတ်မှုအခြေအနေများ၊ စပါးခွံလောင်စာတောင့် ထုတ်လုပ်မှု၊ စျေးကွက်သို့တင်ပို့ရောင်းချမှုအခြေအနေများအား လိုက်လံရှင်းလင်းပြသရာ တိုင်း ဒေသကြီးဝန်ကြီးချုပ်က Gasifier စနစ်မှထွက်ရှိသည့် စွန့်ပစ်ပစ္စည်းများသည် သဘာဝ ပတ်ဝန်းကျင်အား ထိခိုက်ညစ်ညမ်းမှုမရှိစေရန်နှင့် သတ်မှတ်ထားသည့် စည်းမျဉ်း စည်းကမ်းအညီ လည်ပတ်မောင်းနှင်ရန်၊ တိုင်းဒေသကြီးအတွင်းရှိ စပါးခွံလောင်စာသုံး Gasifier စက်ရုံများမှ သဘာဝပတ်ဝန်းကျင်ထိခိုက်မှုမရှိစေရေးအတွက် ပတ်ဝန်းကျင်ထိန်းသိမ်းရေးဦးစီး ဌာနနှင့် စက်မှုကြီးကြပ်ရေးနှင့်စစ်ဆေးရေးဦးစီးဌာနတို့မှ ကွင်းဆင်းစစ်ဆေးခဲ့ပြီး ပြုပြင် ဆောင်ရွက်ရန် အကြံပြုချက်များအပေါ်  လိုက်နာဆောင်ရွက်မှုရှိမရှိ ကြပ်မတ်ဆောင်ရွက်ရန်၊ လုပ်ငန်းတိုးတက်မှုများအား ပြန်လည်တင်ပြရန်နှင့် လေထုညစ်ညမ်းမှုမရှိစေရေးနှင့် စွန့်ပစ် ပစ္စည်းများမှ သဘာဝပတ်ဝန်းကျင်ထိခိုက်မှုမရှိစေရေး စနစ်တကျဆောင်ရွက်ကြရန် လမ်းညွှန် မှာကြားခဲ့ပါသည်။  ဆက်လက်၍ တိုင်းဒေသကြီးဝန်ကြီးချုပ်သည် ပန်းတနော်မြို့နယ်၊ ဘုရားချောင်း ကျေးရွာအုပ်စုရှိ Global Earth Agro & Aqua Industry Public Co., Ltd သို့သွားရောက်ခဲ့ပြီး ကုမ္ပဏီ ဥက္ကဋ္ဌ ဦးဌေးမြင့်နှင့်တာဝန်ရှိသူများက  စပါးခွံလောင်စာသုံး gasifier ဖြင့် gas engine အသုံးပြုပြီး  လျှပ်စစ်ဓါတ်အား ၁၂ မဂ္ဂါဝပ် ထုတ်လုပ်နိုင်မည့် စက်ရုံတည်ဆောက်နေမှု၊ စပါးခွံလောင်စာသုံး boiler ဖြင့် Turbine စနစ် အသုံးပြုပြီး  လျှပ်စစ်ဓါတ်အား (၁၅)မဂ္ဂါဝပ် (၂)လုံး (၃၀)မဂ္ဂါဝပ် လျှပ်စစ်ထုတ်လုပ်နိုင်မည့် စက်ရုံတည်ဆောက်နေမှု၊ စုစုပေါင်း ဓါတ်အား ၄၂ မဂ္ဂါဝပ်ထွက်ရှိလာပါက  လုပ်ငန်းဆောင်ရွက်နိုင်မည့်အခြေအနေများ၊ ဇီဝလောင်စာသုံး Boiler နှင့် Turbine စနစ်ဖြင့် လျှပ်စစ်ဓာတ်အားပေးစက်ရုံနှင့် ဇီဝလောင်စာသုံး gasifier နှင့် gas engine စနစ်ဖြင့် လျှပ်စစ်ဓာတ်အားပေးစက်ရုံများအတွက် စက်ပစ္စည်းများ ရောက်ရှိလာမှု၊ စပါးခွံများ စနစ်တကျသိုလှောင်နိုင်ရန် သိုလှောင်ရုံများတည်ဆောက်နေမှုများ၊ အအေးခန်း စက်ရုံနှင့် သိုလှောင်ရုံများ ဆောက်လုပ်ရေးလုပ်ငန်းခွင်များ၊ အအေးပေးသည့်စနစ်အတွက် စက်ပစ္စည်းများ တပ်ဆင်ပြီးစီးနေမှုများ၊ ငါးအသားလွှာ ပြုပြင်ထုတ်လုပ်ခြင်းနှင့်အေးခဲစက်ရုံတွင် automated cold storage warehouse စနစ်တည်ဆောက်ရန် အပူချိန်ထိန်း နံရံပြားများနှင့် အအေးပေးစက်များတပ်ဆင်နေမှု၊ ငါးများကိုအသားလွှာ၍ အေးခဲခြင်းပြုလုပ်ရာတွင် အသုံးပြုမည့် စက်ပစ္စည်းအချို့ကို စမ်းသပ်ရန်လုပ်ဆောင်နေမှုများအား လိုက်လံရှင်းလင်းပြသခဲ့ပါသည်။ ထို့နောက် ကုမ္ပဏီ အစည်းအဝေးခန်းမတွင် Global Earth Agro & Aqua Industry Public ကုမ္ပဏီလိမိတက် ဥက္ကဌ ဦးဌေးမြင့်နှင့် တာဝန်ရှိသူများက Gasifierများ တပ်ဆင်နေမှုနှင့် Gasifier အဆောက်အဦ တည်ဆောက်နေမှုအားလည်းကောင်း၊ ငါးသားဖောက်ခြင်း၊ ငါးမွေးမြူခြင်း၊ ငါးအစာထုတ်လုပ်ခြင်း၊ အေးခဲခြင်း၊ ထုတ်ပိုးခြင်း၊ သိုလှောင်ခြင်း၊ ရောင်းချခြင်း၊ Biomass လောင်စာသုံး လျှပ်စစ်ဓာတ်အားထုတ်လုပ်ခြင်း၊ သုံးစွဲခြင်းများနှင့် ဆက်စပ်သော လုပ်ငန်းများ၊ စပါးခွံလောင်စာသုံးလျှပ်စစ်ဓါတ်အားပေးစက်ရုံများမှ ထွက်ရှိမည့် စွန့်ပစ်ပစ္စည်း များမှ ဇီဝမြေသြဇာထုတ်လုပ်မည့် အခြေအနေများအားရှင်းလင်းတင်ပြရာ တိုင်းဒေသကြီး ဝန်ကြီးချုပ်က“မိမိတို့ တိုင်းဒေသကြီးသည် စိုက်ပျိုးရေးနှင့် မွေးမြူရေးလုပ်ငန်းများကို အဓိကထားဆောင်ရွက်လျက်ရှိပြီး စိုက်ပျိုးမွေးမြူရေးကို အခြေခံသည့် ကုန်ထုတ်လုပ်မှုနှင့် စက်မှုလုပ်ငန်းများကို အားပေးမြှင့်တင် ဆောင်ရွက်ကြရမှာဖြစ်ပါကြောင်း၊ မွေးမြူရေးလုပ်ငန်း ဆောင်ရွက်ရာတွင်  မိရိုးဖလာမွေးမြူရေး နည်းလမ်းများထက်  စနစ်ကျနပြီးကောင်းမွန်သည့် ခေတ်မီမွေးမြူ ရေးနည်းလမ်းများကို အောင်မြင်အောင်ဆောင်ရွက်ရန်လိုပါကြောင်း မှာကြားခဲ့ပါသည်။

ဧရာဝတီတိုင်းဒေသကြီး ဝန်ကြီးချုပ်ဦးတင်မောင်ဝင်းသည် အစိုးရအဖွဲ့ဝင်ဝန်ကြီးများ၊ ဌာနဆိုင်ရာများနှင့်အတူ ယနေ့နံနက်ပိုင်းက မြောင်းမြခရိုင်အတွင်းရှိတောင်သူများနှင့် တွေ့ဆုံခဲ့ပြီး စိုက်ပျိုးရေးလုပ်ငန်းများအား ကြည့်ရှုစစ်ဆေးခဲ့သည်။ ရှေးဦးစွာ တိုင်းဒေသကြီးဝန်ကြီးချုပ်သည် ဝါးခယ်မမြို့နယ်၊ ကြာဖြူကျေးရွာရှိတောင်သူဦးဝင်းဗိုလ် ၏ လယ်မြေ(၁)ဧကတွင်  သဘာဝမြေဩဇာ စမ်းသပ်ထည့်သွင်းသုံးစွဲထားသည့် နယူးဧရာ(၁)မျိုးစပါး ဘောင်စနစ်ဖြင့်ပျိုးထောင်းထားရှိမှုအား ကြည့်ရှုစစ်ဆေးခဲ့ပြီး သဘာဝမြေဩဇာအသုံးပြု၍ မျိုးစေ့ရေစိမ်ခြင်း၊ စိုက်ပျိုးခြင်းနှင့် မြေဩဇာ ဖြန်းပတ်ခြင်း အခြေအနေများရှင်းလင်းတင်ပြမှုအပေါ်  စတင်စိုက်ပျိုးချိန်မှစ၍ စနစ်တကျမှတ်တမ်းများ ထားရှိဆောင်ရွက်ရန်၊ သဘာဝမြေဩဇာအသုံးပြုခြင်းဖြင့်ရရှိလာသည့် အကျိုးရလဒ်များအား မှတ်တမ်းထားရှိရန်မှာကြားခဲ့သည်။ ယင်းနောက် ကျွန်းကုန်းကျေးရွာချမ်းမြေ့ဆန်စက်တွင် တောင်သူများနှင့်တွေ့ဆုံ၍ “တစ်ဧက(၁၀)တင်းနှုန်း ပိုမိုတိုးတက်ထွက်ရှိရေး အတွက်  မျိုးကောင်းမျိုးသန့်စပါးများဖြင့် ပြောင်းလဲစိုက်ပျိုးခြင်း၊ စိုက်ပျိုးနည်းစနစ်ပြောင်းလဲစိုက်ပျိုးခြင်း၊ သစ်စိမ်းမြေဩဇာပိုက်ဆံလျော်ထည့်သွင်း စိုက်ပျိုးခြင်းများ ဆောင်ရွက်လျက်ရှိပါကြောင်း၊ လာမည့်နှစ်မိုးစပါး စိုက်ရာသီတွင် မြေဆီလွှာဖွံ့ဖြိုးတိုးတက်ရေးအတွက်တိုင်းလုံးကျွတ် သစ်စိမ်းမြေဩဇာ ပိုက်ဆံလျှော်များ အပြည့်အဝထည့်သွင်းစိုက်ပျိုး သွားမည်ဖြစ်ပါကြောင်းနှင့်တောင်သူများအနေဖြင့်လည်း အထွက်နှုန်းများတိုးတက်စေရေး ဝိုင်းဝန်းကြိုးပမ်း ဆောင်ရွက်ကြရန်လိုပါကြောင်း” ပြောကြားပြီး နိုင်ငံ့စီးပွားမြှင့်တင်ရေးရန်ပုံငွေဖြင့် ဆောင်ရွက်သည့် သွင်းအားစုများ ထောက်ပံ့ပေးအပ်ခဲ့သည်။  ဆက်လက်၍ တိုင်းဒေသကြီးဝန်ကြီးချုပ်နှင့် တာဝန်ရှိသူများသည် မြောင်းမြမြို့နယ်၊ ရှုခင်းသာကျေးရွာရှိ “မိသားစု”ဥစားကြက်မွေးမြူရေးကြက်ခြံသို့ သွားရောက်၍ ကြက်ချေး၊ ဝက်ချေးများဖြင့် သဘာဝမြေဩဇာထုတ်လုပ်မည့် ရုရှားဖတ်ဒရေးရှင်းနိုင်ငံ၊ ရောစ့်ကွန်ဂရက်၊ ရင်းနှီးမြှုပ်နှံမှုရန်ပုံငွေအဖွဲ့၏ မြန်မာနိုင်ငံကိုယ်စားလှယ်နှင့် LLC Souznedra ၏ဥက္ကဌနှင့်အဖွဲ့ဝင်များအား တွေ့ဆုံခဲ့ပြီး Mobile သဘာဝမြေဩဇာစက်ရုံတည်ဆောက် ရေးအတွက် ကွင်းဆင်းလေ့လာမှုအခြေအနေများ၊ ကုန်ကြမ်းရရှိမှုအခြေအနေများနှင့် သဘာဝမြေဩဇာထုတ်လုပ်နိုင်ရေးအခြေအနေများရှင်းလင်းဆွေးနွေးခဲ့ကြပြီး တိုင်းဒေသကြီး ဝန်ကြီးချုပ်မှ မြေဆီလွှာကောင်းမွန်စေရေးဆောင်ရွက်နေမှု၊ ဧရာဝတီ ပေါ်ဆန်းအရည်အသွေးကောင်းမွန်စေရေးဆောင်ရွက်မှုနှင့် ဓါတ်မြေဩဇာသုံးစွဲမှု လျှော့ချနိုင်ရေး နှင့် သဘာဝမြေဩဇာများပိုမိုထုတ်လုပ်သုံးစွဲနိုင်ရေးဖြည့်စွက် ဆွေးနွေးပြောကြားခဲ့သည်။ ယင်းနောက် တိုင်းဒေသကြီးဝန်ကြီးချုပ်သည် စိုက်ပျိုးရေးဒေသသုတေသန ဗဟိုဌာန (မြောင်းမြ) တာဝန်ခံနှင့် ဝန်ထမ်းများအားတွေ့ဆုံခဲ့ရာ ရှေးဦးစွာတာဝန်ခံက ၂၀၂၂-၂၀၂၃ဘဏ္ဍာရေးနှစ် အတွင်းဆောင်ရွက်ခဲ့သည့် သုတေသန၊ ဖွံ့ဖြိုးရေးလုပ်ငန်းများအပေါ် ဆောင်ရွက်ပြီးစီးမှု အခြေအနေများနှင့် ၂၀၂၃-၂၀၂၄ ဘဏ္ဍာရေးနှစ်အတွင်းဆောင်ရွက်မည့် သုတေသန၊ ဖွံ့ဖြိုးရေး လုပ်ငန်းများကိုရှင်းလင်းတင်ပြရာ တိုင်းဒေသကြီးဝန်ကြီးချုပ်က“သုတေသနပြုလုပ်ငန်း များအားဆက်လက်ဆောင်ရွက်သွားရန် ဧရာဝတီပေါ်ဆန်းမူလအရည်အသွေးပြန်လည်ရရှိစေရေး သုတေသနပြုဆောင်ရွက်ရန်နှင့် သစ်စိမ်းမြေဩဇာပိုက်ဆံလျှော်စိုက်ပျိုးခြင်းဖြင့်ရနိုင်သည့် အကျိုးကျေးဇူး၊ ပိုက်ဆံလျှော်နှင့်နွားချေးရောစပ်သုံးစွဲခြင်းဖြင့်ရနိုင်သည့်အကျိုးကျေးဇူး၊ ပိုက်ဆံလျှော်၊ နွားချေးနှင့်အခြားသဘာ၀မြေသြဇာများပေါင်းစပ်သုံးစွဲခြင်းဖြင့် ရနိုင်သည့်အကျိုးကျေးဇူးတို့အားသုတေသနပြုလုပ်သွားရန်”ပြောကြားခဲ့ပြီး မျိုးကူးစပ် အဆောက်အဦရှိ အင်းမရဲဘော်နှင့် ပေါ်ဆန်းမျိုးပျိုးထောင်ရန်ဆောင်ရွက်နေမှုနှင့် မျိုးစေ့များပြသထားရှိမှုနှင့် ချဉ်ပေါင်လျှော်မျိုးများ မျိုးစုဆောင်းထိန်းသိမ်းခြင်းစိုက်ခင်းနှင့် သီးလုံးပုဂုန်လျှော်မျိုးများ မျိုးစုဆောင်းထိန်းသိမ်းခြင်း စိုက်ခင်းများအားကြည့်ရှုစစ်ဆေးခဲ့သည်။ ဆက်လက်၍ အိမ်မဲမြို့နယ်၊ ဘုရားကြီးကုန်းကျေးရွာရှိ တောင်သူဦးစိန်မောင်သန်း၏ လယ်မြေ(၈)ဧကတွင် ဆင်းသုခမျိုးစပါးစိုက်ပျိုးထားရှိမှုအား ကြည့်ရှုအားပေးခဲ့ပြီး တစ်ဧက(၁၀)တင်းနှုန်းပိုမိုအထွက်တိုးစေရေးနှင့် အောင်မြင်အောင် ဆောင်ရွက်စေရေးမှာကြားခဲ့သည်။

ဧရာဝတီတိုင်းဒေသကြီး၊ပုသိမ်မြို့ပြည်သူ့ဆေးရုံကြီး၌ (၆၂)ကြိမ်မြောက်ဆေးဘက်ကျွမ်းကျင်-၄ (ဓာတ်ခွဲ) (၈)လ သင်တန်းဖွင့်ပွဲအား ယနေ့နံနက်ပိုင်းက အဆိုပါဆေးရုံကြီး၏ အစည်းအဝေးခန်းမတွင် ပြုလုပ်ခဲ့ရာသင်တန်းဖွင့်ပွဲသို့ တိုင်းဒေသကြီးဝန်ကြီးချုပ်ဦးတင်မောင်ဝင်း၊ အစိုးရအဖွဲ့ဝင် ဝန်ကြီးများ၊ သင်တန်းသား၊ သင်တန်းသူများ တက်ရောက်ခဲ့ကြသည်။ သင်တန်းဖွင့်ပွဲတွင် တိုင်းဒေသကြီးဝန်ကြီးချုပ်က “ နိုင်ငံတော်နှင့် ပြည်သူလူထုအတွက် ကျန်းမာရေးစောင့်ရှောက်မှုပေးနိုင်ရန်အတွက် ဆေးပညာနှီးနွယ်တက္ကသိုလ်သင်တန်းကျောင်းများမှ နိုင်ငံတော်၏ပံ့ပိုးမှုနှင့် ပညာသင်ကြားပို့ချခြင်းများဆောင်ရွက်လျက်ရှိပြီး ဆေးရုံကြီးများ မှလည်း အကူသူနာပြုသင်တန်းများ ကျွမ်းကျင်ဝန်ထမ်းသင်တန်းများပို့ချလျက်ရှိပါကြောင်း၊ မိမိတို့တိုင်းဒေသကြီးတွင်လည်း ပုသိမ်ပြည်သူ့ဆေးရုံ(၉)ထပ်တိုးချဲ့ဆောင်ဖွင့်လှစ်ခဲ့ပြီးဖြစ်၍ ရုပ်ပိုင်းဆိုင်ရာသာမက ကုသရေးလုပ်ငန်းများပါ ထိထိမိမိဆောင်ရွက်လျက်ရှိပါကြောင်း၊ ထို့အပြင်လူ့စွမ်းအားအရင်းအမြစ်ဖွံ့ဖြိုးတိုးတက်ရေးအတွက် သင်တန်းများကိုလည်း အခက်အခဲ မရှိအဆင်ပြေစွာ ဖွင့်လှစ်သင်ကြားပေးလျက်ရှိပါကြောင်း၊ ဆေးရုံများသည်ကျန်းမာရေး စောင့်ရှောက်မှုစနစ်တွင်အရေးပါသောအခန်းကဏ္ဍမှ ပါဝင်ပါကြောင်း၊ ထို့အတူ ဆရာဝန်၊ သူနာပြု၊ ဓာတ်ခွဲ၊ ဓာတ်မှန်၊ ကျွမ်းကျင်ဝန်ထမ်းများနှင့် အခြားအရည်အချင်းပြည့်ဝသည့် ဝန်ထမ်းများပါရှိသောကျန်းမာရေးစောင့်ရှောက်မှု အဖွဲ့အစည်းဖြစ်ပါကြောင်း၊ ကျန်းမာရေး စောင့်ရှောက်မှုစနစ်တွင် ဓာတ်ခွဲဝန်ထမ်းများသည်လည်း အရေးကြီးသောအခန်းကဏ္ဍတွင်ပါဝင် နေသောကြောင့် အရည်အချင်းပြည့်ဝသော ဓာတ်ခွဲဝန်ထမ်းများအား နိုင်ငံတော်မှနှစ်စဉ် မွေးထုတ်ပေးလျက်ရှိပါကြောင်း၊ ဓာတ်ခွဲပညာရပ်သည် လူနာများ၏ရောဂါကုသမှု စတင်ရန်အတွက် ရောဂါရှာဖွေပေးခြင်း၊ ကုသမှုပေးရာတွင်လည်းရောဂါသက်သာမှု ရှိ/မရှိ စစ်ဆေးပေးနိုင်ခြင်း ရောဂါပြင်းထန်မှုအခြေအနေကို ခန့်မှန်းပေးနိုင်ခြင်းစသည့် အရေးကြီးသောအခန်းကဏ္ဍတွင် ပါဝင်ပါကြောင်း၊  ဓာတ်ခွဲခန်းမှထုတ်ပေးသော အဖြေများပေါ်မူတည်၍ကုသမှုများ ပေးရခြင်းကြောင့် စမ်းသပ်စစ်ဆေးမှုအဖြေများမှန်ကန်ရန်လိုအပ်သဖြင့် သင်ကြားပေးသော ဘာသာရပ်များကို သေချာ လေ့လာသင်ယူရမှာဖြစ်ပါကြောင်း၊ သင်တန်းသား/သူများအနေဖြင့် ဓါတ်ခွဲပညာရပ်များဆိုင်ရာ လုပ်ငန်းအပေါ်တွင် အဆင့်မြင့်အောင်ကြိုးပမ်း၍ အရည်အသွေးပညာဗဟုသုတ များကိုလည်း တိုးတက်အောင်ကြိုးပမ်းဆောင်ရွက်ရမှာဖြစ်ပါကြောင်းနှင့် သင်တန်းပြီးမြောက်ပါက နိုင်ငံတော်နှင့်ပြည်သူလူထုအတွက် ကျန်းမာရေးစောင့်ရှောက်မှုပေးခြင်းဖြင့်  ပြန်လည်အကျိုးပြု၍ နိုင်ငံတော်၏ လိုအပ်ချက်အား တစ်ထောင့်တစ်နေရာမှ ဖြည့်တင်းလုပ်ကိုင်နိုင်မည်ဖြစ်သော ကြောင့် သင်တန်းကာလတစ်လျောက် ပို့ချသောပညာရပ်များအားကြိုးစားသင်ယူ သွားရန်” တိုက်တွန်းအမှာစကားပြောကြားပြီး သင်တန်းသား/ သူများအတွက်ထောက်ပံ့ငွေများ ပေးအပ်ခဲ့ကာ စုပေါင်းမှတ်တမ်းတင် ဓာတ်ပုံများ ရိုက်ကူးခဲ့သည်။ ယနေ့ဖွင့်လှစ်သည့် ဆေးဘက်ကျွမ်းကျင်-၄(ဓာတ်ခွဲ) သင်တန်းသည် (၈)လကြာသင်တန်းဖြစ်ပြီး သင်တန်းသား၊ သင်တန်းသူ (၅၇)ဦး တက်ရောက်လျက်ရှိကြောင်းသိရသည်။