ဧရာဝတီတိုင်းဒေသကြီးအစိုးရအဖွဲ့ ဝန်ကြီးချုပ်ဦးလှမိုးအောင်သည် တိုင်းဒေသကြီး အစိုးရအဖွဲ့ဝင်ဝန်ကြီးများနှင့်အတူ ၂၀၂၀ပြည့်နှစ်၊ ဩဂုတ်လ (၈)ရက်နေ့ မွန်းလွဲပိုင်းအချိန် တွင် ဧရာဝတီတိုင်းဒေသကြီး၊ မအူပင်ခရိုင်၊ ပန်းတနော်မြို့နယ်သို့ သွားရောက်ခဲ့ပြီး ဧရာဝတီ မြစ်ရေမြှင့်တက်မှုနှင့် မြစ်ရေတိုက်စားမှုကြောင့် မြစ်ကမ်းပြိုကျမှုဖြစ်ပေါ်ခဲ့ပြီး ပြောင်းရွေ့ခဲ့ရ သောအိမ်ထောင်စုများအား ရေပေါ်ကြီးကျေးရွာအုပ်စု၊ဒေါင့်ကြီးကျေးရွာရှိ ရတနာသိင်္ဂီဘုန်းတော်ကြီးကျောင်း၌ သွားရောက်တွေ့ဆုံခဲ့ပြီး တိုင်းဒေသကြီးဝန်ကြီးချုပ်နှင့်ဝန်ကြီးများက အားပေးစကားများ ပြောကြားခဲ့ကာ ပန်းတနော်မြို့နယ်၊ ရောပေါ်ကြီးကျေးရွာအုပ်စုနှင့် ကဿဝင်ကျေးရွာအုပ်စုတို့အတွင်း ၂၀၂၀ပြည့်နှစ် ဩဂုတ်လ ၄ ရက်နေ့မှ ဩဂုတ်လ ၆ ရက်နေအထိ မြစ်ကမ်းပါး ပြိုကျမှုကြောင့် ပြောင်းရွေ့ခဲ့ရသည့် အိမ်ထောင်စု(၃၄)စုအတွက် အိမ်ထောင်စုတစ်စုလျှင် (၅၀၀၀၀)ကျပ်နှုန်းဖြင့် ထောက်ပံ့ငွေစုစုပေါင်း ၁၇ သိန်းကျပ်အား ထောက်ပံ့ ပေးအပ်ခဲ့ပါကြောင်းသတင်းရရှိပါသည်။ (အဆိုပါ ထောက်ပံ့ငွေပေးအပ်ပွဲ အခမ်းအနားသို့ တိုင်းဒေသကြီးအစိုးရအဖွဲ့ ဝန်ကြီးချုပ်ဦးလှမိုးအောင်နှင့် တိုင်းဒေသကြီးအစိုးရအဖွဲ့ဝင် ဝန်ကြီးများ၊ တိုင်းဒေသကြီး/ ခရိုင်/ မြို့နယ်အဆင့်ဌာနဆိုင်ရာတာဝန်ရှိသူများနှင့် ဒေသခံ ပြည်သူများ တက်ရောက်ခဲ့ကြပါသည်)

မြစ်ကမ်းပြိုမှုကြောင့် ပြောင်းရွေ့ခဲ့ရသည့်နေအိမ်များတွက် သဘာဝဘေးအန္တရာယ်ဆိုင်ရာ စီမံခန့်ခွဲမှုဦးစီးဌာန၊ မအူပင်ခရိုင်ဦးစီးမှူးရုံးမှ တာဝန်ရှိသူများက အိမ်ထောင်စု (၃၂) စုမှ လူဦးရေ (၁၇၅) ဦးအတွက် အိမ်ဆောက်ပစ္စည်းဖိုးရန်ပုံငွေ (၃၂၀၀၀၀၀) ကျပ်၊ (၇) ရက်စာ ဆန်ရိက္ခာဖိုး ရန်ပုံငွေ (၃၆၇၅၀၀) ကျပ်၊ ကယ်ဆယ်ရေးပစ္စည်းတန်ဖိုး စုစုပေါင်း (၃၅၆၇၅၀၀) ကျပ်အား၂၀၂၀ပြည့်နှစ် ဩဂုတ်လ ၇ ရက်နေ့မှာ ဘေးသင့်ပြည်သူများ လက်ဝယ်အရောက် ထောက်ပံ့ပေးအပ်ခဲ့​ပါသည်။

ထို့နောက် တိုင်းဒေသကြီးဝန်ကြီးချုပ်နှင့်အဖွဲ့သည် မြို့နယ်အထွေထွေအုပ်ချုပ်ရေးဦးစီးဌာန၊ အစည်းအဝေးခန်းမတွင် ဌာနဆိုင်ရာများဖြင့်တွေ့ဆုံခဲ့ပြီး၂၀၂၀ပြည့်နှစ် ဇူလိုင်လ ၇ ရက် နေ့တွင် ပန်းတနော်မြို့၊ CB ဘဏ်အတွင်း လုယက်မှုဖြစ်ပွားခဲ့သည့် ဖြစ်စဉ်နှင့်ပတ်သက်၍ တာဝန်ရှိသူများမှ power point ဖြင့် အသေးစိပ်ရှင်းလင်းတင်ပြခဲ့ပြီး တိုင်းဒေသကြီးဝန်ကြီးချုပ်မှ လုံခြုံရေးတိုးချဲ့ဆောင်ရွက်ရန်ကိစ္စများနှင့်ပတ်သက်၍ တာဝန်ရှိသူများအား အသေးစိပ်လမ်းညွှန်မှာကြားခဲ့​ပါသည်။