ဧရာဝတီတိုင်းဒေသကြီးသည် မြစ်ချောင်းအင်းအိုင်ပေါများသည့် တိုင်းဒေသကြီးဖြစ်သည့်အတွက် လမ်းပန်းဆက်သွယ်ရေး ခက်ခဲလျက်ရှိပါသည်။ လမ်းပန်းဆက်သွယ်ရေးများ ကောင်းမွန်လာပါက ကျေးလက်ဒေသများ အလျင်အမြန်ဖွံ့ဖြိုးတိုးတက်လာပြီး ကျေးလက်နေပြည်သူများ၏ လူမှုစီးပွားဘဝဖွံ့ဖြိုးတိုးတက်လာမည် ဖြစ်ပါသည်။ ကျေးလက်ဒေသများ ဖွံ့ဖြိုးတိုးတက်လာသည်နှင့်အမျှ မြို့နယ်/ခရိုင်/တိုင်းဒေသကြီးအထိ ဖွံ့ဖြိုးတိုးတက်လာမည်ဖြစ်ပြီး နိုင်ငတော်အဆင့်အထိ ဖွံ့ဖြိုးမှုအသီးအပွင့်များ ခံစားကြရမည် ဖြစ်ပါသည်။

ဧရာဝတီတိုင်းဒေသကြီးအစိုးရအဖွဲ့ အနေဖြင့်လည်း တိုင်းဒေသကြီးအတွင်းရှိ ကျေးလက်ဒေသများ ဖွံ့ဖြိုးတိုးတက်ရေး ဆောင်ရွက်လျက်ရှိရာ အစိုးရအဖွဲ့ ဝန်ကြီးချုပ် ဦးလှမိုးအောင်သည် (၂၅.၁၁.၂၀၁၈)ရက်နေ့တွင် တိုင်းဒေသကြီးလွှတ်တော် ဒုတိယဥက္ကဋ္ဌ၊ တိုင်းဒေသကြီးအစိုးရအဖွဲ့ဝင် ဝန်ကြီးများ၊ တိုင်ဒေသကြီးအစိုးရအဖွဲ့ အတွင်းရေးမှူး၊ လွှတ်တော်ကိုယ်စားလှယ်များ၊ သက်ဆိုင်ရာ တိုင်း/ခရိုင်/မြို့နယ်အဆင့်ဌာနဆိုင်ရာများ၊ ဒေသခံများနှင့်အတူ ဒေးဒရဲမြို့နယ်၊ ဂုံမင်းကွင်းကျေးရွာအုပ်စုတွင် နန္ဒာအောင်မြေပရဟိတအသင်းမှ လှူဒါန်းငွေကျပ် (၆၄၄)သိန်းဖြင့် ဆောက်လုပ်ထားသည့် အဝပြန်ကျေးရွာရှိ သုခနန္ဒာတံတား၊ ချမ်းမြေ့သာယာလမ်းနှင့် ချမ်းမြေ့သာယာတံတား စစ်မြစ်တန်းကျေးရွာရှိ အေးမြသာယာတံတား၊ ထိုင်ကူမြစ်တန်းကျေးရွာရှိ အောင်သုခတံတားတို့အား ဖွင့်လှစ်သည့် အခမ်းအနားသို့ တက်ရောက်ခဲ့ပြီး ထိုင်ကူမြစ်တန်းကျေးရွာရှိ ကျောင်းသစ်ဘုန်းတော်ကြီးကျောင်းတွင် ဒေသခံပြည်သူများနှင့်တွေ့ဆုံပြီး ဒေသဖွံ့ဖြိုးရေးဆိုင်ရာကိစရပ်များ ဆွေးနွေးပြောကြားခဲ့ပါသည်။