ပုသိမ် ဩဂုတ် ၁၁

ဧရာဝတီတိုင်းဒေသကြီးဝန်ကြီးချုပ်နှင့်အဖွဲ့သည် ပုသိမ်မြို့၊ ကိုးသိန်းအားကစားခန်းမ တွင်ပြုလုပ်သည့် ၂၀၂၅ ခုနှစ်၊ တိုင်းဒေသကြီးနှင့်ပြည်နယ် မြန်မာ့သိုင်းပြိုင်ပွဲသို့ ဝင်ရောက် ယှဉ်ပြိုင်မည့် ဧရာဝတီတိုင်းဒေသကြီး မြန်မာ့သိုင်းအသင်း၏ သရုပ်ပြသမှုများအား ကြည့်ရှုအားပေးခဲ့သည်။ ဦးစွာ ဧရာဝတီတိုင်းဒေသကြီး မြန်မာ့သိုင်းအသင်းမှ ၆၃ မောင်း၊ လက်ရေးစွမ်းရည် ပြသခြင်း၊ သင်တန်းခွဲမှုဆရာအဆင့် လှံရှည်ပညာစဉ်ပြသခြင်း၊ လက်သိုင်းအတိုက်ပြိုင်ပွဲဝင်များ လေ့ကျင့်မှုပြသခြင်း၊ တွဲဖက်နည်းပြဆရာအဆင့် လက်သိုင်းပညာစဉ်ပြသခြင်း၊ ၁+၁ အဖွဲ့လိုက် လက်နက်မဲ့နှင့်ဓားမြောင် စွမ်းရည်ပြသခြင်း၊ ၁+၂ အဖွဲ့လိုက် လက်နက်မဲ့ဓားမြောင်၊ ဓားရှည် စွမ်းရည် ပြသခြင်း၊ ၁+၃ အဖွဲ့လိုက် ဓားရှည်လေးလက် ဝိုင်းတွက် စွမ်းရည် ပြသခြင်းများကို ကြည့်ရှုအားပေးခဲ့ပြီး ပြိုင်ပွဲဝင်အားကစားသမားများအနေဖြင့် လေ့ကျင့်သားပြည့်ဝပြီး ပြိုင်ပွဲများယှဉ်ပြိုင်ရာတွင် အားသွန်ခွန်စိုက် ကြိုးစားယှဉ်ပြိုင် ကြရန်နှင့် ရရှိသည့်အချိန်တွင် စိတ်ဓာတ်ခွန်အားအပြည့်ဖြင့် ကြိုးစားလေ့ကျင့်ရန်လိုပါကြောင်း၊ ကျန်းမာရေးကိုလည်း ဂရုစိုက်ရန်နှင့် မျှော်မှန်းထားသည့်ဆုတံဆိပ်များ ရရှိအောင်ကြိုးစား ယှဉ်ပြိုင်ကြရမည် ဖြစ်ပါကြောင်း ” တိုက်တွန်းမှာကြားခဲ့ပြီး အာဟာရဖြည့်စားသောက်ဖွယ်ရာများနှင့် ရေဓာတ်အားဖြည့်အချိုရည်များပေးအပ်ခဲ့ကြောင်း သိရှိရပါသည်။