ပုသိမ်    ဖေဖော်ဝါရီ    ၂၂

ဧရာဝတီတိုင်းဒေသကြီးဝန်ကြီးချုပ်နှင့် တိုင်းဒေသကြီးအစိုးရအဖွဲ့ဝင်ဝန်ကြီးများသည် ပုသိမ်မြို့ မရမ်းချိုကျောင်းတိုက်တွင် ပြုလုပ်သော ဧရာဝတီတိုင်းဒေသကြီး သံဃနာယကအဖွဲ့ အနားယူ၊ အစားထိုးရွေးချယ်ခြင်း အခမ်းအနားတက်ရောက်ခဲ့ပြီး အခမ်းအနားကို “နမောတဿ” သုံးကြိမ်ရွတ်ဆို ဘုရားကန်တော့၍ ဖွင့်လှစ်ခဲ့ပြီး အခမ်းအနားမှူးဆရာတော်က အစည်းအဝေးသို့ ကြွရောက်တော်မူလာကြသော တိုင်းဒေသကြီး/ပြည်နယ်သံဃာ့ဝန်ဆောင်များ၏ အရေအတွက်ကို ဖတ်ကြား လျှောက်ထားပြီး အစည်းအဝေးထမြောက်အောင်မြင်ကြောင်း ကြေညာကာ အစည်းအဝေး သဘာပတိဆရာတော်က အဖွင့်ဩဝါဒကထာ မြွက်ကြားသည်။

ထို့နောက် တိုင်းဒေသကြီးအစိုးရအဖွဲ့ ဝန်ကြီးချုပ်က သာသနာရေးဆိုင်ရာများကို လျှောက်ထား၍ ကြီးကြပ်ရေးဆရာတော်များအား လှူဖွယ်ပစ္စည်းများ ဆက်ကပ်လှူဒါန်းခဲ့ပြီး အနားယူခြင်းဆိုင်ရာ လုပ်ငန်းစီမံချက်အရ အနားယူသော ဆရာတော်၏ ဘွဲ့အမည်စာရင်းကို ကြေညာခြင်း၊ ပြန်လည်ရွေးချယ်နိုင်ရန်အတွက် မူလသတ်မှတ်ထားသည့် သက်ဆိုင်ရာနယ်မြေအလိုက် အမည်စာရင်းတင်သွင်းမည့် အဆိုရှင် တိုင်းဒေသကြီး/ပြည်နယ်သံဃာ့ ဝန်ဆောင်ဆရာတော်ကို ဖိတ်ခေါ်ခြင်းများ ဆောင်ရွက်ခဲ့ပြီး ပြန်လည်ရွေးချယ်ခံရသည့် တိုင်းဒေသကြီး/ပြည်နယ်သံဃနာယကဆရာတော် ဘွဲ့အမည်စာရင်းကို တိုင်းဒေသကြီး/ပြည်နယ်သံဃာ့ဝန်ဆောင် အစည်းအဝေးသို့ တင်သွင်းပြီး သာဓု(၃)ကြိမ် ခေါ်၍ အတည်ပြုကာ သဘာပတိဆရာတော်က နိဂုံးချုပ်ဩဝါဒကထာ မြွက်ကြားပြီး “ဗုဒ္ဓသာသနံ စိရံ တိဋ္ဌတု" သုံးကြိမ်ရွတ်ဆို၍ အခမ်းအနားကို ရုတ်သိမ်းခဲ့သည်။ ဆက်လက်၍ တိုင်းဒေသကြီးအစိုးရအဖွဲ့ဝန်ကြီးချုပ်နှင့် အစိုးရအဖွဲ့ဝင်ဝန်ကြီးများသည် အခမ်းအနားသို့  ကြွရောက်လာသော ဆရာတော်သံဃာတော်များအား နေ့လည်ဆွမ်းဖြင့် ဆက်ကပ်လှူဒါန်းခဲ့သည်။