ပုသိမ် စက်တင်ဘာ ၆

ဧရာဝတီတိုင်းဒေသကြီး၊ (၂၅)ကြိမ်မြောက်ငွေရတုအထိမ်းအမှတ် မြန်မာ့ရိုးရာယဉ်ကျေးမှု အဆို၊ အက၊ အရေး၊ အတီးပြိုင်ပွဲအား တတိယနေ့ ပြိုင်ပွဲများ ပုသိမ်မြို့၊ မြို့တော်ခန်းမ၌ ဆက်လက်ကျင်းပလျက်ရှိရာ တိုင်းဒေသကြီးဝန်ကြီးချုပ်ဦးတင်မောင်ဝင်းသည် တာဝန်ရှိသူများနှင့် အတူ ပြိုင်ပွဲဝင်များ၏ ပါဝင်ယှဉ်ပြိုင်နေမှုများကို သွားရောက်ကြည့်ရှုအားပေးခဲ့သည်။

ဦးစွာ တိုင်းဒေသကြီးဝန်ကြီးချုပ်နှင့်အဖွဲ့သည်  မြန်မာ့ရိုးရာယဉ်ကျေးမှု အဆို၊ အက၊ အရေး၊ အတီးပြိုင်ပွဲအား တတိယနေ့ညနေပိုင်း ပြိုင်ပွဲများဖြစ်သည့် ဝါသနာရှင်ဒုတိယတန်း(အမျိုးသား/ အမျိုးသမီး)ဆိုင်းတစ်ဦးချင်း၊ အခြေခံပညာ (၁၅-၂၀ အမျိုးသား/အမျိုးသမီး) ဆိုင်းတစ်ဦးချင်း၊ ဝါသနာရှင်ပထမတန်း(အမျိုးသမီး) ဆိုင်းဝိုင်းကြီးအဖွဲ့လိုက်၊ ဝါသနာရှင်ဒုတိယတန်း (အမျိုးသား/ အမျိုးသမီး) ဆိုင်းဝိုင်းကြီးအဖွဲ့လိုက်တို့၏ ပြိုင်ပွဲဝင်ယှဉ်ပြိုင်နေမှုများကို ကြည့်ရှုအားပေးခဲ့သည်။ ထို့နောက် တိုင်းဒေသကြီးဝန်ကြီးချုပ်နှင့်အဖွဲ့သည် ပုသိမ်မြို့၊ အမှတ်(၁)အခြေခံပညာ အထက်တန်းကျောင်း၊ ရတနာတန်ဆောင်ခန်းမ၌ကျင်းပသည့် ဝါသနာရှင်ပထမတန်း (ရုပ်စုံသဘင်) ပြိုင်ပွဲအား ဆက်လက်ကြည့်ရှုအားပေးခဲ့ပြီး (ရုပ်စုံသဘင်)အဖွဲ့အား ချီးမြှင့်ငွေများပေးအပ်ခဲ့သည်။