ဧရာဝတီတိုင်းဒေသကြီး ဝန်ကြီးချုပ်ဦးတင်မောင်ဝင်းသည် တိုင်းဒေသကြီးအစိုးရအဖွဲ့ဝင်များ၊ တိုင်း၊ ခရိုင်၊ မြို့နယ်ဌာနဆိုင်ရာများနှင့်အတူ ယနေ့ နံနက်ပိုင်းက ပန်းတနော်မြို့နယ်သို့ ဒေသဖွံ့ဖြိုးရေးလုပ်ငန်းများ ကွင်းဆင်းဆောင်ရွက်ခဲ့သည်။  ဦးစွာ ဧရာဝတီတိုင်းဒေသကြီးဝန်ကြီးချုပ် ဦးတင်မောင်ဝင်းနှင့် အဖွဲ့သည် ပန်းတနော်မြို့နယ်၊ ဘုရားချောင်း ကျေးရွာအုပ်စုရှိ Global Earth Agro & Aqua Industry Public Co., Ltd သို့သွားရောက်ခဲ့ပြီး ကုမ္ပဏီ ဥက္ကဋ္ဌ ဦးဌေးမြင့်က ငါးသားပေါက်မွေးမြူရေးကန်မှ ငါးအသားတိုးမွေးမြူရေးကန်များသို့ ငါးပြောင်းရွှေ့ပန့်ဖြင့်ပြောင်းရွှေ့ မွေးမြူမှု အခြေအနေ ကြည့်ရှုစစ်ဆေးခဲ့ပြီး ငါးပြောင်းရွှေ့ပန့်ဖြင့် တစ်နာရီလျှင် ၃၀ ဂရမ်အရွယ်အစားရှိ ငါးအကောင်ရေ (၆) သိန်းခန့်ပြောင်းရွှေ့နိုင်ကြောင်းသိရသည်။

ထို့နောက် ခေတ်မီ နည်းစနစ်များဖြင့် (၅) ဧကတွင်  ရေသွင်းရေထုတ်စနစ်ပါသည့် မြေသားကန်တည်ဆောက်ခြင်းနှင့် Best Aquaculture Practice (BAP) စနစ်နှင့်အညီ ရေလှောင်ကန် reservoir တည်ဆောက်ခြင်း၊ ရေထုတ်ပြွန်တည်ဆောက်ခြင်းများအား စက်ယန္တရားများနှင့်ဆောင်ရွက်နေမှုများအားလည်းကောင်းမှု၊ စပါးခွံသုံး Biomass Power Plant တိုးတက်တည်ဆောက်နေမှုနှင့် အပိုင်းလိုက်အမြန်ဆုံးစမ်းသပ်လည်ပတ်နိုင်ရေးဆောင်ရွက်နေမှု အပြင် ဘေးထွက်ပစ္စည်း biochar များကို မြေဩဇာအဖြစ် ထုတ်လုပ်နိုင်ရေးဆောင်ရွက်နေမှု၊   နိုင်ငံတကာစံညွှန်းများနှင့်အညီ ငါးအစာ Feed Factory တည်ဆောက်မှုလုပ်ငန်းစဉ်များ၊ Seafood Processing & ColdStorage Plant ဆောင်ရွက်လျက်ရှိမှုနှင့် စက်ပစ္စည်းကိရိယာများ တိုးတက်တပ်ဆင်ဆောင်ရွက်လျက်ရှိမှု၊  Tank Farm များတွင် ငါးတန်များအား (၈၀) ဂရမ် အရွယ်အစားမှ ရောင်းတန်းဝင်သည်အထိ(၈)လ ခန့်ဖြင့် တစ်ကန်လျှင် အကောင်ရေ (၈၀၀၀၀) အား စနစ်တကျမွေးမြူထားရှိမှုများအား လိုက်လံရှင်းလင်းပြောကြားခဲ့ရာ တိုင်းဒေသကြီးဝန်ကြီးချုပ်က မိမိတို့တိုင်းဒေသကြီးသည် စိုက်ပျိုးရေးနှင့် မွေးမြူရေးလုပ်ငန်းများကို အဓိကထားဆောင်ရွက်လျက်ရှိပြီး စိုက်ပျိုးမွေးမြူရေးကို အခြေခံသည့် ကုန်ထုတ်လုပ်မှုနှင့် စက်မှုလုပ်ငန်းများကို အားပေးမြှင့်တင်ဆောင်ရွက်ကြရမှာဖြစ်ပါကြောင်း၊ မွေးမြူရေးလုပ်ငန်းဆောင်ရွက်ရာတွင်  မိရိုးဖလာမွေးမြူရေး နည်းလမ်းများထက်  စနစ်ကျနပြီးကောင်းမွန်သည့် ခေတ်မီမွေးမြူ ရေးနည်းလမ်းများကိုအောင်မြင်အောင်ဆောင်ရွက်ရန်လိုပါကြောင်းနှင့် ငါးတန်မွေးမြူထုတ်လုပ်ရေးလုပ်ငန်းများကိုပြည်တွင်းသာမကပြည်ပဈေးကွက် များသို့တင်ပို့ ရောင်းချရန်စီမံဆောင်ရွက်နေမှုများအပေါ်သက်ဆိုင်ရာဌာနများနှင့်ပေါင်းစပ် ဆောင်ရွက်ပေးခဲ့သည်။