ဧရာဝတီတိုင်းဒေသကြီးအစိုးရအဖွဲ့ ဝန်ကြီးချုပ် မန်းဂျော်နီသည် (၂၇.၂.၂၀၁၇)ရက်နေ့တွင် တိုင်းဒေသကြီးလုံခြုံရေးနှင့်နယ်စပ်ရေးရာဝန်ကြီး ဗိုလ်မှူးကြီးကျော်စွာလှိုင်၊ တိုင်းဒေသကြီးလျှပ်စစ်၊ စွမ်းအင်၊ စက်မှုလက်မှုနှင့်လမ်းပန်းဆက်သွယ်ရေးဝန်ကြီး ဦးဝင်းဌေး၊ တိုင်းဒေသကြီးအစိုးရအဖွဲ့ အတွင်းရေးမှူး၊ တိုင်းဒေသကြီး/ခရိုင်/မြို့နယ်အဆင့်ဌာနဆိုင်ရာ တာဝန်ရှိသူများနှင့်အတူ ပုသိမ်မြို့၊ မြို့တော်ခန်းမတွင်ကျင်းပပြုလုပ်သော မြန်မာနိုင်ငံကိုယ်အင်္ဂါမသန်စွမ်းသူများအသင်း၊ တိုင်းဒေသကြီးမသန်စွမ်းသူများ ဧရာဝတီတိုင်းဒေသကြီးရုံး (၇)နှစ်မြောက် ပညာသင်စရိတ်၊ အထောက်အကူပြုပစ္စည်းပေးအပ်ပွဲအခမ်းအနားသို့ တက်ရောက်ခဲ့ပါသည်။

ဝန်ကြီးချုပ်မှ အဖွင့်အမှာစကားပြောကြားပြီး တိုင်းဒေသကြီးအတွင်းရှိ မသန်စွမ်းကလေးသူငယ်များအတွက် ပညာသင်စရိတ်ထောက်ပံ့ကြေးပေးအပ်ရာ တာဝန်ရှိသူများက လက်ခံရယူပါသည်။ တိုင်းဒေသကြီး လုံခြုံရေးနှင့်နယ်စပ်ရေးရာဝန်ကြီး ဗိုလ်မှူးကြီးကျော်စွာလှိုင်၊ တိုင်းဒေသကြီးလျှပ်စစ်၊ စွမ်းအင်၊ စက်မှုလက်နှင့်လမ်းပန်းဆက်သွယ်ရေးဝန်ကြီး ဦးဝင်းဌေးတို့က မသန်စွမ်းသုံးအထောက်အကူပြုပစ္စည်း များကို မသန်စွမ်းသူများထံပေးအပ်ပါသည်။

အလှူရှင်များက မြန်မာနိုင်ငံကိုယ်အင်္ဂါမသန်စွမ်းသူများအသင်း၊ ဧရာဝတီတိုင်းဒေသကြီးရုံးသို့ အလှူငွေများပေးအပ်လှူဒါန်းရာ ကိုယ်အင်္ဂါမသန်စွမ်းသူများအသင်းရုံး၏ ဥက္ကဌ ဦးမြတ်ဦးနှင့် အတွင်းရေးမှူး ဦးအေးကိုကိုတို့က လက်ခံရယူခဲ့ပြီး မြန်မာနိုင်ငံကိုယ်အင်္ဂါမသန်စွမ်းသူများအသင်း၊ ဧရာဝတီတိုင်းဒေသကြီးရုံးမှ နာယက ဦးဝင်းထွန်းက ကျေးဇူးတင် စကားပြန်လည် ပြောကြားခဲ့ပါသည်။